Ermənistanın Konstitusiya Məhkəməsi seçkidən dörd şikayətə baxacaq
Ermənistanın Konstitusiya Məhkəməsi iyulun 9-da növbədənkənar parlament seçkisinin rəsmi nəticələrindən verilmiş dörd şikayətə baxacaq. Novator.az-ın məlumatına görə, iyunun 20-də keçirilmiş seçkinin rəsmi nəticələrinin ləğvi istənən müraciətlər bir icraatda birləşdirilib.
Proporsional sistemin tətbiq olunduğu 20 iyun seçkisinə 21 siyasi partiya, 4 blok qatılıb. İyunun 27-də Mərkəzi Seçki Komissiyası seçkinin nəticələrini təsdiqləyib. 107 nəfərlik yeni parlamentdə hökumət başçısı Nikol Paşinyanın Vətəndaş Sazişi Partiyasının 71 mandatla təmsil olunacağı açıqlanıb.
İkinci prezident Robert Köçəryanın, Daşnaksütun Partiyası və Dirçələn Ermənistan Partiyasının cəm olduğu Ermənistan bloku 29, üçüncü prezident Serj Sərkisyanın sədrlik etdiyi Ermənistan Respublikaçılar Partiyasını Milli Təhlükəsizlik Xidmətinin sabiq direktoru Artur Vanetsyanın Vətən Partiyası ilə birləşdirən “Qürurluyam” bloku 7 mandat alıb.
Seçkinin rəsmi nəticələri Nikol Paşinyana yenidən hökumət qurmaq imkanı verir.
Konstitusiya Məhkəməsinə 20 iyun seçkisinin rəsmi nəticələrinin ləğvi müraciəti ilə Ermənistan, “Qürurluyam” blokları, həmçinin parlamentə düşə bilməyən Erməni Vətəni və Oyanış partiyaları üz tutub.
Erməni Vətəni Partiyası seçkidə 1,3 faiz, Oyanış Partiyası 0,4 faiz səs alıb.
İş üzrə əsas cavabdeh Mərkəzi Seçki Komissiyası, digər cavabdehlər Baş Prokurorluq, Ermənistan Polisi, Televiziya və Radio üzrə Milli Komissiyadır.
Hakim Vətəndaş Sazişi Partiyası prosesdə üçüncü tərəf kimi iştirak etmək niyyətindədir.
2017-ci il aprelin 2-də Vətəndaş Sazişi Partiyasının daxil olduğu “Çıxış” bloku qanunverici orqana 9 mandat qazanıb.
2018-ci il aprelin 9-da Ermənistan parlament idarə üsuluna keçib: icra hakimiyyətinin ali orqanı funksiyası Nazirlər Kabinetinə, dövlət idarəçiliyinə rəhbərlik baş nazirə ötürülüb.
2008-ci ildən prezident postunu tutmuş Serj Sərkisyan 2018-ci il aprelin 17-də baş nazir postuna oturub, ancaq aprelin 23-də xalq etirazları səbəbindən istefa verib. Mayın 8-də baş nazir postuna etirazların lideri Nikol Paşinyan gətirilib. O, həmin il oktyabrın 16-da istefa verib (ancaq səlahiyyətlərinin icrasını davam etdirib), ardınca parlament buraxılıb. Dekabrın 9-da keçirilmiş növbədənkənar parlament seçkisində onun liderlik etdiyi blok qalib gəlib, 2019-cu il yanvarın 14-də Nikol Paşinyan yenidən baş nazir postuna təyinat alıb.
2020-ci ilin noyabr ayından bir qrup müxalif partiya baş nazirin istefasını tələb edib. 2021-ci il aprelin 25-də Nikol Paşinyan və hökuməti növbədənkənar parlament seçkisi naminə istefaya gedib. Mayın 10-da qanunverici orqan buraxılıb, iyunun 20-nə növbədənkənar parlament seçkisi təyin olunub.
Hazırda Nikol Paşinyan, onun müavinləri, nazirlər və başqa hökumət üzvləri səlahiyyətlərin icraçısı sayılır.
