Yarımfinala qədər
16-cı Avropa futbol çempionatının yarımfinalına vəsiqə alan komandaların üçü titul sahibidir.
İyunun 11-də start götürən çempionatın 48 oyunu arxada qalıb. Novator.az bildirir ki, qrup mərhələsi, 1/8 final və 1/4 finalda 135 qol qeydə alınıb. Hər matça 2,8-dən çox qol düşür.
Amsterdam, Bakı, Budapeşt, Buxarest, Kopenhagen, Qlazqo, London, Münhen, Roma, Sankt-Peterburq və Sevilya şəhərlərinin ev sahibliyi etdiyi oyunları stadionlarda 909 mindən çox (orta hesabla hər matçı 19 minə yaxın) azarkeş izləyib.
6-7 iyula təyin olunan yarımfinal cütlükləri belə müəyyənləşib:
İtaliya – İspaniya
İngiltərə – Danimarka.
Final oyunu iyulun 11-də keçiriləcək.
İspaniya 1964, 2008, 2012-ci illərdə, İtaliya 1968-ci ildə, Danimarka 1992-ci ildə Avropa çempionu olub.
1960-cı ildə turniri SSRİ, 1972, 1980, 1996-cı illərdə Almaniya, 1976-cı ildə Çexoslovakiya, 1984, 2000-ci illərdə Fransa, 1988-ci ildə Niderland, 2004-cü ildə Yunanıstan, 2016-cı ildə Portuqaliya zəfərlə başa vurub.
