Fövqəladə Hallar Nazirliyi Xəzər dənizində iyulun 4-ü axşam baş vermiş partlayış və yanğınla bağlı məlumat yayıb. Qeyd olunur ki, dənizdə neft-qaz hasilatı, sənaye və nəqliyyat infrastrukturlarına aid obyektlərdə hər hansı fövqəladə hadisə baş verməyib: “İyulun 5-i səhər nazirliyin aviasiya dəstəsinin vertolyotu cəlb olunmaqla kəşfiyyat uçuşlarına başlanıb. Dənizin Salyan rayonu istiqamətində, sahildən təqribən 30 kilometr məsafədəki Daşlı adasında palçıq vulkanının püskürdüyü bilinib. Hazırda vulkanın kraterində nisbətən kiçik alov müşahidə olunur. Vulkanın dənizdəki neft-qaz infrastrukturu və digər obyektlər, habelə insan həyatı üçün təhlükəsi yoxdur”.

Respublika Seysmoloji Xidmət Mərkəzi isə iyulun 5-i saat 04:02-də Xəzərdə 3,2 bal gücündə zəlzələ olduğunu xəbər verir. Zəlzələnin ocağının 44 kilometr dərinlikdə yerləşdiyi bildirilir.