“Sürprizlər istisna deyil”
İyulun 2-də 16-cı Avropa futbol çempionatının 1/4 finalı start götürür. Həmin gün İsveçrə ilə İspaniya, Belçika ilə İtaliya üz-üzə gələcək. Çexiya – Danimarka və Ukrayna – İngiltərə görüşləri iyulun 3-nə təyin olunub.
Novator.az-a danışan futbol icmalçısı Rasim Mövsümzadə deyir ki, Niderland, Portuqaliya, Fransa və Almaniyanın mübarizəni dayandırmasından sonra bütün diqqətlər Belçika – İtaliya görüşünə yönəlib: “1972-2016-cı illəri əhatə edən son 8 qarşılaşmada hərəyə 3 qələbə qazanan bu rəqiblərin mübarizəsində qalib tərəf, şübhəsiz, Avropa çempionluğuna əsas namizəd sayılacaq.
Digər cütlüklərdə İspaniya, Danimarka və İngiltərə ilk baxışdan favorit hesab olunsalar da, İsveçrə və Çexiya kimi komandaların 1/4 finala çıxması onu göstərir ki, bu mərhələdə də sürprizlər istisna deyil. Ukrayna komandasının finala kimi irəliləməsi də mümkündür.
Danimarka millisinin çıxışı çox bəyənilir. Yarışın ən texnikalı komandalarından biri aşkar cinah oyununa üstünlük verən çexlərin əsas qol silahı, komandasının 5 qolundan 4-nə imza atan Patrik Şikin ayağını bağlasa, çətinlik çəkmədən yarımfinala çıxa bilər”.
İyunun 11-də start götürən Avropa futbol çempionatına Amsterdam, Bakı, Budapeşt, Buxarest, Kopenhagen, Qlazqo, London, Münhen, Roma, Sankt-Peterburq və Sevilya şəhərləri ev sahibliyi edir.
