Pambıq mahlıc, qızıl, pomidor…
İqtisadi İslahatların Təhlili və Kommunikasiya Mərkəzinin hesabatına görə, 2021-ci ilin yanvar-may aylarında Azərbaycandan 907,6 milyon ABŞ dolları dəyərində qeyri-neft məhsulu ixrac olunub, göstərici 2020-ci ilin ilk beş ayına nəzərən 25,4 faiz artıb.
Ən çox ixrac edilən malların siyahısında pambıq mahlıcı 108,6 milyon dollarla, qızıl 87,4 milyon dollarla, pomidor 87 milyon dollarla göstərilir.
Qeyd olunur ki, qeyri-neft sektoru üzrə ixracın əsas ünvanları siyahısına Rusiya, Türkiyə, İsveçrə, Gürcüstan və ABŞ başçılıq edirlər.
2016-cı ildə yaradılan İqtisadi İslahatların Təhlili və Kommunikasiya Mərkəzinin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.
