Deyilmir fondun nəyi var…
2021-ci ilin fevral ayından bəri Azərbaycan Ordusuna Yardım Fondunun vəsaiti barədə məlumat yayılmır.
2002-ci il avqustun 17-dən Silahlı Qüvvələrə Yardım Fondu fəaliyyət göstərib. Prezident fərmanı ilə yaradılmış qurumun əsas maliyyə mənbəyi hüquqi və fiziki şəxslərin könüllü verdiyi vəsait olub, Müdafiə Nazirliyi hər ay fondda nə qədər pul toplandığı barədə bilgi yayıb.
2020-ci il dekabrın 8-də prezident fərmanı ilə Silahlı Qüvvələrə Yardım Fondunun bazasında Azərbaycan Ordusuna Yardım Fondu yaradılıb, Müdafiə Nazirliyi sərəncamçı təyin olunub.
Əsasnaməyə görə, fondun vəsaiti fiziki və hüquqi şəxslərin könüllü ianələri və qanunla qadağan olunmayan digər mənbələr hesabına formalaşır, bu məqsədlər üçün istifadə edilir: Azərbaycan Ordusunun maddi-texniki bazasının inkişafı; hərbi texnika, silah və sursatın alınması; hərbi təyinatlı məmulatların hazırlanması, sınaqdan keçirilməsi, istehsalı, təmiri və modernləşdirilməsi; hərbi elmi tədqiqat və təcrübə-konstruktor işlərinin aparılmasının təşkili; hərbi qulluqçuların sosial və məişət problemlərinin həll edilməsi; peşəkar hərbi kadrların hazırlanması və onların əlavə təhsili.
Novator.az bildirir ki, Müdafiə Nazirliyi Azərbaycan Ordusuna Yardım Fondunun vəsaiti barədə axırıncı bilgini fevralın 1-də yayıb. Həmin rəsmi məlumatda qeyd olunub ki, Azərbaycan Ordusuna Yardım Fondunda 212,1 milyon manat, 11,1 milyon ABŞ dolları, 183,4 min avro, 593,9 min Türkiyə lirəsi, 1,8 min İngiltərə funt sterlinqi və 5,3 milyon rubl vəsait var.
Bundan sonra Azərbaycan Ordusuna Yardım Fondunun vəsaiti barədə aylıq hesabatların verilməsi dayandırılıb.
