Bizim nəzarətdən kənarda neçə yaşayış məntəqəmiz var?
Xankəndi şəhəri; Şuşa rayonunun 1 qəsəbəsi (Turşsu qəsəbəsi) və 36 kəndi; Xocavənd şəhəri, rayonun 1 qəsəbəsi (Qırmızı Bazar qəsəbəsi) və 45 kəndi; Xocalı şəhəri, rayonun 1 qəsəbəsi (Əsgəran qəsəbəsi) və 44 kəndi; Ağdərə şəhəri və keçmiş Ağdərə rayonunun 35 kəndi; Laçın şəhəri və rayonun 6 kəndi.
Ümumilikdə 5 şəhər, 3 qəsəbə və 166 kənd.
Novator.az saytı bildirir ki, hazırda Rusiya qoşunlarının və erməni separatçılarının nəzarətində olan, yəni hələlik Azərbaycanın nəzarət edə bilmədiyi şəhər, qəsəbə və kəndlərimizin sayı bu qədərdir.
Ermənistanın 1988-1994-cü illərdə işğal etdiyi torpaqlarımızın qalan hissəsi 2020-ci ilin Vətən müharibəsində – Azərbaycan Silahlı Qüvvələrinin həmin il sentyabrın 27-dən apardığı hərbi əməliyyatlarda və noyabrın 10-da Rusiyanın vasitəçiliyi ilə əldə edilən atəşkəs razılaşması nəticəsində qurtulub. Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad edilib.
Vətən müharibəsindən sonra Azərbaycanın Yuxarı Qarabağ bölgəsində və Ermənistana gedən Laçın yolunda Rusiyanın sülhməramlı hərbi kontingenti yerləşdirilib. Bu kontingentin odlu silahlarla silahlanmış 1960 hərbi qulluqçudan, 90 hərbi zirehli texnikadan, 380 ədəd avtomobildən və xüsusi texnikadan ibarət, bölgədə qalma müddətinin 5 il olduğu açıqlanıb.
