Bank: aktivlər, öhdəliklər, problemli kreditlər
Novator.az bank sektorunun rəsmi göstəricilərinə nəzər salıb. Mərkəzi Bank 2021-ci il iyunun 1-nə Azərbaycanın 26 bankının aktivlərini 33 milyard 810,7 milyon manat, öhdəliklərini 29 milyard 58,2 milyon manat göstərir, yanvar-may aylarında bankların 273,2 milyon manat xalis mənfəət əldə etdiyini bildirir.
Başqa bir statistikaya əsasən, iyunun 1-nə ölkədə 906,9 milyon manat problemli kredit rəsmiləşib. Yanvarın 1-nə problemli kreditlərin həcmi 893,1 milyon manat idi.
2015-ci ilin əvvəlinə vaxtında qaytarılmayan kreditin məbləği 976,3 milyon manat olub. Həmin ilin devalvasiyaları ilə ABŞ dollarının rəsmi kursu 0,7844 manatdan 1,5594 manata yüksəlib, bu, problemli kreditlərin artımına rəvac verib.
2016-cı ilin əvvəlinə 1 milyard 508,5 milyon manat məbləğində problemli kredit qeydə alınıb.
2017-ci ilin əvvəlinin göstəricisi 1 milyard 472,6 milyon manat olub.
2018-ci ilin əvvəlinə ödəniş vaxtı keçmiş kreditlərin məbləği 1 milyard 626,7 milyon manat, 2019-cu ilin əvvəlinə 1 milyard 585 milyon manat göstərilib.
Prezidentin 28 fevral 2019-cu il fərmanı fiziki şəxslərlə 2012-ci il yanvarın 1-dən bağlanmış kredit müqavilələri üzrə gecikən borclar üçün devalvasiya kompensasiyaları ödənib.
2020-ci ilin əvvəlində ödəniş vaxtı keçmiş kreditlərin 1 milyard 273,1 milyon manat həddində olduğu açıqlanıb.
