Hər oyuna iki top yarım
16-cı Avropa futbol çempionatının qrup mərhələsi bitib. Novator.az bildirir ki, iyunun 11-dən 23-dək çəkmiş raundun 36 oyununda 96 qol qeydə alınıb. Bu, hər matça 2,61 top deməkdir. Portuqaliyalı Kriştiano Ronaldo 5 qolla hamını qabaqlayır.
Amsterdam, Bakı, Budapeşt, Buxarest, Kopenhagen, Qlazqo, London, Münhen, Roma, Sankt-Peterburq və Sevilya şəhərlərinin ev sahibliyi etdiyi oyunları stadionlarda 649 minə yaxın (orta hesabla hər matçı 18 mindən bir qədər çox) azarkeş izləyib.
Qruplarda ilk iki yeri tutan komandalar və üçüncü yerdə qərarlaşan komandaların dördü 1/8 finala vəsiqə alıb. Cütlüklər belə müəyyənləşib:
Uels – Danimarka
İtaliya – Avstriya
Niderland – Çexiya
Belçika – Portuqaliya
Xorvatiya – İspaniya
Fransa – İsveçrə
İngiltərə – Almaniya
İsveç – Ukrayna.
1960-cı ildə SSRİ, 1964, 2008, 2012-ci illərdə İspaniya, 1968-ci ildə İtaliya, 1972, 1980, 1996-cı illərdə Almaniya, 1976-cı ildə Çexoslovakiya, 1984, 2000-ci illərdə Fransa, 1988-ci ildə Niderland, 1992-ci ildə Danimarka, 2004-cü ildə Yunanıstan, 2016-cı ildə Portuqaliya Avropa çempionu olub.
