Döyüş təlimində
Naxçıvan Qarnizonu Qoşunları iyunun 21-dən Türkiyə Silahlı Qüvvələrinin idarəetmə orqanları ilə birgə taktiki-xüsusi təlim keçirir. Müdafiə Nazirliyinin məlumatına görə, Naxçıvan Muxtar Respublikası Ali Məclisinin sədri Vasif Talıbov iyunun 22-də təlimi izləyib: “Əlahiddə Ümumqoşun Ordusunun video formatlı konfransına qatılan birləşmə və hissə komandirləri əvvəlcədən göndərilmiş döyüş sərəncamına uyğun olaraq yaranmış vəziyyəti məruzə ediblər. Təlim mərkəzində düşmənin artilleriya batareyasını təqlid edən batareya ön xətt bölmələrimizə atəş zərbələri endirib. Düşmənin bu fəaliyyəti “Bayraktar-TB2” pilotsuz uçuş aparatından izlənərək artilleriya batareyasının koordinatları döyüşü idarəetmə mərkəzindən artilleriya bölmələrinə ötürülüb. Hərəkətdə olan düşmən kolonunu aşkar edən xüsusi təyinatlı qrupumuz pilotsuz uçuş aparatı ilə əlaqə yaradaraq qrupun istiqamətləndirilməsini, yaxınlaşan düşmənin tərkibini, kolonun düzülüş ardıcıllığını, yaxınlıqda olan düşmənin digər bölmələrinin fəaliyyətini öyrənib. Eyni zamanda qrupa doğru hərəkət edən helikopterlə xüsusi təyinatlı qrup arasında qarşılıqlı əlaqə yaradılıb.
Coğrafi Analiz Sistemindən istifadəyə başlanıb. Türkiyənin “PİRİREİS” informasiya texnologiyaları şirkətinin texniki müdiri Adil Yoltay bildirib ki, sistem obyektləri yüksək görüntü keyfiyyəti ilə və dəqiq koordinatlarla, üçölçülü formatda təqdim edir.
Sonra artilleriya batareyasının taktiki təlimində atəş mövqeyini tutmaq üçün hərəkətdə olan batareyanın düşmənin artilleriya atəşinə məruz qaldıqda göstərəcəyi praktik fəaliyyəti izlənib. Düşmənin müdafiə dərinliyimizə sızıb keçmiş kəşfiyyat diversiya qrupunun Daxili Qoşunların əlahiddə əməliyyat briqadasının bölmələrinin pilotsuz uçuş aparatının köməyi ilə aşkar və məhv edilməsi üçün qarşılıqlı əlaqədə fəaliyyəti icra olunub.
Sərhəd pozuntusu barədə məlumat alındığı andan sərhəd bölgəsində pilotsuz uçuş aparatı ilə sərhəd pozucularının yeri aşkar edilib, koordinatları müəyyən edildikdən sonra məlumat “Naxçıvan” Əlahiddə Sərhəd Diviziyasının komandanlığına ötürülüb. Çevik hərəkət taboru bölməsi helikopterlə əraziyə endirilərək sərhəd pozucularını zərərsizləşdirib”.
Təlim iyunun 23-də başa çatır.
