Baydenin komandası: yeni siyahı
Novator.az saytı yenidən ABŞ prezidenti Cozef Baydenin administrasiyasının tərkibinə nəzər salıb.
İyunun 23-nə yalnız bir təyinat rəsmiləşməmiş qalır: İnzibati-Büdcə İdarəsi direktorunun səlahiyyətlərini Şalanda Yunq icra edir.
ABŞ-da hökumət üzvlərinin təyinatını Konqresin yuxarı palatası olan Senat təsdiqləyir. Təyinatı xeyir-dua alan katiblər (nazirlər) bunlardır:
Entoni Blinken – dövlət katibi (xarici işlər naziri)
Lloyd Ostin – müdafiə naziri
Merrik Qarland – ədliyyə naziri (baş prokuror)
Deb Holann – daxili işlər naziri
Alexandro Mayorkas – daxili təhlükəsizlik naziri
Canet Yellen – maliyyə naziri
Cina Raymondo – ticarət naziri
Pit Butticiç – nəqliyyat naziri
Cennifer Qrenholm – energetika naziri
Tom Vilsek – kənd təsərrüfatı naziri
Marşa Fac – tikinti və şəhər inkişafı naziri
Marti Uolş – əmək naziri
Xavyer Beserra – səhiyyə və sosial xidmətlər naziri
Denis Makdonou – veteranlarla iş naziri
Miqel Kardona – təhsil naziri.
Milli Kəşfiyyata Evril Heyns direktorluq edir.
Ketrin Tay ticarət nümayəndəsi, İzabel Qusman Kiçik Biznes Administrasiyasının rəhbəri, Sesiliya Rouz İqtisadi Məşvərətçilər Şurasının sədri, Erik Lender Elm və Texnologiya Siyasəti Ofisinin rəisi, Maykl Stenli Riqan Ətraf Mühitin Mühafizəsi Agentliyinin rəisi, Linda Tomas-Qrinfild ABŞ-ın BMT-dəki daimi nümayəndəsidir.
Seçkili vitse-prezident postunu Kamala Harris tutur.
Ağ ev administrasiyasının başçısı vəzifəsi Ron Kleynə həvalə olunub. Bu təyinat üçün Senatın təsdiqi gərək deyil.
2020-ci il noyabrın 3-də keçirilmiş ümumxalq səsverməsində Cozef Bayden 538 nəfərlik Seçicilər Kollegiyasına 306 nümayəndə qazanıb. Seçicilər Kollegiyasındakı 14 dekabr 2020-ci il səsverməsi də eyni nəticə ilə yekunlaşıb. 2021-ci il yanvarın 7-də Senatın və Konqresin alt qanadı olan Nümayəndələr Palatasının birgə iclasında Seçicilər Kollegiyasındakı səsvermənin nəticəsi – Cozef Baydenin prezident seçilməsi təsdiqlənib. Yanvarın 20-də Cozef Bayden and içərək prezident səlahiyyətlərinin icrasına başlayıb.
1942-ci il təvəllüdlü Cozef Bayden 1987-1995-ci illərdə Senatın Məhkəmə Komitəsinə, 2001-2003 və 2007-2009-cu illərdə Xarici Əlaqələr Komitəsinə sədrlik edib. 2009-2017-ci illərdə vitse-prezident olub.
