Azad bölgədə yeni hərbi hissə
İşğaldan azad edilmiş ərazilərdəki Azərbaycan Ordusu bölmələrinin növbəti modul tipli yerləşmə məntəqəsi istifadəyə verilib. Müdafiə Nazirliyinin 23 iyun məlumatına görə, açılış mərasimində çıxış edən hərbi birlik komandiri general-mayor Mais Bərxudarov deyib ki, modul tipli qurğularda silah otağı, yataqxana, yeməkxana, mətbəx, hamam-sanitar qovşağı, zabit və gizirlər üçün xidməti otaqlar, tibb məntəqəsi, ərzaq anbarı, əşya anbarı, dizel yanacağı ilə işləyən elektrik generatorları, qazanxana, qurutma otağı var, döyüş növbətçiliyinin və qoşun xidmətinin yüksək səviyyədə təşkili və aparılması üçün bütün imkanlar yaradılıb.
Qeyd edilib ki, yeni alınan səyyar avadanlıqlar sayəsində şəxsi heyət daim isti yemək və məişət xidmətləri ilə təmin ediləcək.
Azad edilmiş ərazilərdə yerləşən hərbi hissələrə, mövqe və postlara yeni yollar çəkilir, elektrik, su və qaz xətləri quraşdırılır.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
