“Təmiz Şəhər” Şuşaya da məsul edildi
İyunun 22-də prezident İlham Əliyev “Təmiz Şəhər” Açıq Səhmdar Cəmiyyətinin fəaliyyət dairəsini genişləndirməyə sərəncam verib. Sənədə görə, Şuşa şəhərinin ərazisində əmələ gələn bütün bərk məişət tullantılarının yığılmasını, daşınmasını, yerləşdirilməsini və zərərsizləşdirilməsini həmin qurum həyata keçirəcək.
2008-ci il avqustun 6-da yaradılan “Təmiz Şəhər” Bakı şəhərinin ərazisində əmələ gələn bütün bərk məişət tullantılarının yerləşdirilməsi və zərərsizləşdirilməsi işlərinə məsuldur.
22 iyun 2021-ci il sərəncamı ilə “Təmiz Şəhər” Açıq Səhmdar Cəmiyyəti Bakı şəhərinin ərazisində əmələ gələn bütün bərk məişət tullantılarının yerləşdirilməsi və zərərsizləşdirilməsi ilə yanaşı Bakı şəhərinin Qala qəsəbəsinin və Şuşa şəhərinin ərazisində əmələ gələn belə tullantıların yığılması və daşınması işlərini də görəcək.
Əsası 1750-ci ildə Qarabağ xanlığının paytaxtı kimi qoyulan Şuşa şəhəri 1992-ci il mayın 8-dən 2020-ci il noyabrın 8-dək işğalda olub.
2021-ci il mayın 7-də Şuşa şəhəri Azərbaycanın mədəniyyət paytaxtı elan edilib.
