İsveç hara gedir?
İsveç parlamenti iyunun 21-də baş nazir Stefan Levenə etimadsızlıq göstərib. Təşəbbüsü Sol Partiya, İsveç Demokratları Partiyası, Xristian Demokrat Partiyası, Mötədil Koalisiya Partiyasından olan ümumilikdə 181 deputat dəstəkləyib.
Novator.az bildirir ki, 1957-ci il təvəllüdlü Stefan Leven Sosial Demokrat Fəhlə Partiyasının lideridir. O, ilk dəfə 2014-cü il oktyabrın 3-də baş nazir kürsüsünə əyləşib. 2018-ci il sentyabrın 9-da keçirilmiş parlament seçkisində Sosial Demokrat Fəhlə Partiyası, Sol Partiya və Ətraf Mühiti Mühafizə Partiyasından ibarət blok 349 nəfərlik qanunverici orqana 144 mandat, sağ mərkəzçi alyans (Mötədil Koalisiya Partiyası, Liberallar Partiyası, Xristian Demokrat Partiyası, Mərkəz Partiyası) 143 mandat, millətçi İsveç Demokratları Partiyası 62 mandat əldə edib. 2019-cu il yanvarın 18-də Stefan Leven koalisiya hökuməti qurub.
Hökumət qurmaq üçün 175 mandat gərəkdir.
Yaxın bir həftə ərzində Stefan Leven ya istefa verməli, ya da ölkə növbədənkənar parlament seçkisinə getməlidir.
