Antonio Quterreş yenə baş katib seçildi
İyunun 18-də BMT-nin Baş Məclisi Təhlükəsizlik Şurasının təqdimatına baxaraq Antonio Quterreşi yenidən qurumun baş katibi seçib. Novator.az-ın məlumatına görə, Antonio Quterreşin ikinci beş il üçün səlahiyyət müddəti 2022-cı il yanvarın 1-də başlayacaq.
Antonio Quterreş ilk dəfə 2016-cı il oktyabrın 13-də baş katib seçilib, 2017-ci il yanvarın 1-dən bu vəzifədədir.
1949-cu ildə Lissabonda doğulan Antonio Quterreş Portuqaliya Sosialist Partiyasının baş katibi olub, ölkəsində baş nazir postunu tutub, Sosialist İnternasionalına, Avropa İttifaqı Şurasına başçılıq edib və BMT-nin qaçqınlar üzrə ali komissarı vəzifəsində çalışıb.
1945-ci ildə yaradılan BMT 193 ölkəni bir araya gətirir. Təhlükəsizlik Şurasının 15 üzvü var. Onların 5-i (ABŞ, Böyük Britaniya, Fransa, Rusiya, Çin) daimi üzvlərdir. 10 üzv iki ildən bir seçilir.
Antonio Quterreşə qədər BMT-nin baş katibi postunu bu şəxslər tutub: Trüqve Li, Daq Hammerşeld, U Tan, Kurt Valdhaym, Havyer Peres de Kuelyer, Butros Butros-Qali, Kofi Annan, Pan Gi Mun.
