Qərarlar anonsu
İyunun 24-də Avropa İnsan Hüquqları Məhkəməsi Azərbaycandan üç şikayət üzrə qərarlar elan edəcək. Novator.az hüquqçu Xalid Ağalıyevə istinadla bildirir ki, Elşən Əliyevin şikayəti ölkədən çıxışına yasaq qoyulması ilə bağlıdır. O, şikayətlərinə baxılarkən Avropa İnsan Hüquqları Konvensiyası ilə tanınan hərəkət azadlığı və səmərəli hüquq müdafiə vasitələri hüququnun pozuntusuna yol verildiyini iddia edir.
Zülfüqar İbrahimov yerli məhkəmələrin onun həbsi ilə bağlı yetərli və uyğun əsaslar təqdim etməməsindən, girov qarşılığında sərbəst buraxılması istəyinin rədd olunmasından şikayətçidir. Ərizəçi azadlıq və toxunulmazlıq hüququnun pozulduğunu bildirir.
Abbasov və başqaları Azərbaycanda mülki iddialarla məhkəmə davası açıblar, ancaq işə ərizəçilərin iştirakı olmadan baxılıb, prosesin vaxtı və yeri onlara bildirilməyib. Şikayətçilər ədalətli məhkəmə araşdırması hüququnun pozuntusuna məruz qaldıqlarını iddia edirlər.
Hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub.
