Püşk Azərbaycan klublarına kimləri qismət etdi?
2021-2022-ci illər mövsümündə ilk dəfə keçiriləcək UEFA Konfrans Liqasında Azərbaycanı “Keşlə”, “Qarabağ” və “Sumqayıt” komandaları təmsil edir. Onlar turnirə ikinci mərhələdən (22-29 iyul) başlayır. Novator.az-ın məlumatına görə, iyunun 16-da atılan püşk “Keşlə”yə Rusiyadan “Soçi”ni, “Qarabağ”a İsraildən “Aşdod”u, “Sumqayıt”a Serbiyadan “Çukariçki”ni qismət edib.
Belçikadan “Anderlext”, Avstriyadan LASK, Yunanıstandan PAOK, Portuqaliyadan “Paşuş de Ferreyra”, Niderlanddan “Vitess”, Rusiyadan “Rubin”, Ukraynadan “Kolos” (Kovalyovka), Türkiyədən “Trabzonspor”, İsveçrədən “Lüsern” üçüncü mərhələdən (5-12 avqust) start götürür.
Dördüncü mərhələyə (19-26 avqust) İtaliyadan “Roma”, İngiltərədən “Tottenhem”, Fransadan “Renn”, Almaniyadan “Union Berlin” buraxılıb
UEFA Çempionlar Liqasında Azərbaycanı təmsil edən Bakının “Neftçi” komandasına 6-14 iyulda keçiriləcək birinci raundda Gürcüstandan “Dinamo” (Tbilisi) rəqib olub. Bu mərhələni keçəcəyi halda bakılılar ikinci raundda (20-28 iyul) Yunanıstandan “Olimpiakos”la üz-üzə gələcək.
Üçüncü mərhələdə (3-10 avqust) “Neftçi”nin Çexiyadan “Slaviya”, Şotlandiyadan “Reyncers”, dördüncü mərhələdə (17-25 avqust) Avstriyadan “Zalsburq”la görüşməsi mümkündür.
İspaniyadan “Atletiko”, “Real”, “Barselona”, “Sevilya”, “Vilyarreal”, İngiltərədən “Mançester Siti”, “Mançester Yunayted”, “Liverpul”, “Çelsi”, Almaniyadan “Bavariya”, “Leypsiq”, “Borussiya” (Dortmund), “Volfsburq”, İtaliyadan “İnter”, “Milan”, “Atalanta”, “Yuventus”, Fransadan “Lill”, PSJ, Portuqaliyadan “Sportinq”, “Portu”, Rusiyadan “Zenit”, Belçikadan “Brügge”, Ukraynadan “Dinamo”, Niderlanddan “Ayaks”, Türkiyədən “Beşiktaş” qrup raundunda (14 sentyabr-8 dekabr) yer alırlar.
Birinci mərhələdə ələnəcəyi halda “Neftçi” Konfrans Liqasına köçərək turnirin ikinci raundunda “Makkabi” (Hayfa, İsrail) – “Kayrat” (Qazaxıstan) cütlüyünün məğlubu ilə görüşəcək.
2021-2022-ci illər mövsümündə Avropanın klub turnirlərinə 55 UEFA üzvünün 237 komandası buraxılıb. Çempionlar Liqasında 80, Avropa Liqasında 21, Konfrans Liqasında 136 komanda var.
Çempionlar Liqasının ilkin və birinci mərhələlərində ələnən komandalar Konfrans Liqasına, ikinci, üçüncü, dördüncü mərhələlərində ələnən və qrup mərhələsində üçüncü yeri tutan komandalar Avropa Liqasına köçür.
Avropa Liqasının təsnifat raundlarında ələnən və qrup mərhələsində üçüncü yeri tutan komandalar Konfrans Liqasına transfer olunur.
