İyunun 14-ü Belçikanın paytaxtı Brüsseldə NATO sammiti çərçivəsində ABŞ prezidenti Cozef Baydenlə Türkiyə prezidenti Rəcəb Teyyub Ərdoğan arasında təkbətək görüş keçirilib.

Görüş mətbuata qapalı olub.

AZƏRTAC xəbər verir ki, həmin gün Brüsseldə keçirdiyi mətbuat konfransında Türkiyə prezidenti deyib ki, qlobal sabitliyin qorunmasında NATO-nun həm qərarlılığı, həm də üzərinə götürməli olduğu məsuliyyətlər artıb: “İndi məsuliyyətdən qaçmaq dövrü deyil”.

NATO sammitində və zirvə çərçivəsində keçirdiyi ikitərəfli görüşlərdə faydalı müzakirələr aparıldığını diqqətə çatdıran Rəcəb Teyyub Ərdoğan Türkiyənin xarici siyasəti, qlobal və regional proseslərdə sərgilədiyi mövqe, o cümlədən terrorizmlə mübarizədə apardığı qətiyyətli mücadilə barədə geniş məlumat verib. O, diqqətə çatdırıb ki, Türkiyə haqlı və mənafelərinə uyğun mövqelərini qorumaqda qərarlıdır.

Qafqaz bölgəsindəki vəziyyəti şərh edərkən Rəcəb Teyyub Ərdoğan deyib: “Səylərimiz nəticəsində Dağlıq Qarabağda otuz illik gecikmə ilə də olsa ədalət bərpa olundu, düşmənçiliyin yerini sülhün, xaosun yerini sabitliyin, münaqişənin yerini uzunmüddətli sülhün ala biləcəyi qapılar açıldı”.