16-cı Avropa futbol çempionatında iştirak edən Ukrayna milli komandasının geyim forması ilə bağlı yeni tələb qoyulub.

Novator.az bildirir ki, yığma üzvlərinin köynəyinin (futbolkalarının) çöl hissəsinə Rusiyanın ilhaq etdiyi Krım da daxil olmaqla Ukraynanın xəritəsinin cizgiləri həkk edilib, hərbi salamlama şüarı – “Yaşasın Ukrayna!” yazılıb.

Köynəyin iç hissəsində isə “Yaşasın qəhrəmanlar!” şüarı yer alır.

Qitənin ali futbol təşkilatı – UEFA-nın iyunun 10-da yaydığı açıqlamada qeyd olunur ki, “Yaşasın qəhrəmanlar!” şüarı formanın rəsmən təsdiqlənən variantına sonradan əlavə edilib, siyasi və militarist məna daşıyır. UEFA həmin şüarı köynəkdən yığışdırmağı tələb edib.

2014-cü ilin fevralında Ukraynada hakimiyyət xalq üsyanı ilə dəyişib, Rusiyanın adamlarını Qərbə yaxın qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib, ölkənin şərqindəki iki separatçı rejimin əli ilə Donetsk və Luqansk vilayətlərinin bir hissəsini işğal edib. Vətən müharibəsində Ukrayna minlərlə şəhid verib.

16-cı Avropa futbol çempionatı iyunun 11-də start götürür. Ukrayna milli komandası C qrupunda Niderland, Avstriya, Şimali Makedoniya ilə yarışacaq. Qrupun oyunları Amsterdam və Buxarestə salınıb.