Dövlətə yeni cərimələr
İyunun 10-da Avropa İnsan Hüquqları Məhkəməsinin Azərbaycanla bağlı yeni qərarları elan olunub. Novator.az bildirir ki, hüquqşünas Xalid Ağalıyevin yaydığı məlumata görə, Emin Ələkbərov və daha 6 nəfərin şikayətinə baxan məhkəmə ərizəçilərin Avropa İnsan Hüquqları Konvensiyası ilə verilən azadlıq və toxunulmazlıq hüququnun pozulduğu qənaətinə gəlib. Qərar dövlətin 7 ərizəçinin hər birinə 3 min avro təzminat ödəməsini nəzərdə tutur. Xərc və məsrəflərə görə isə ümumilikdə 1000 avro təzminat verilməlidir.
Bu iş Səid Nursi dini təriqəti təmsilçilərinin şikayəti ilə bağlıdır. Olaylar 2015-ci ildə Gədəbəy rayonunda baş verib. İddia edilib ki, təriqət üzvlərinin toplaşdığı evə rəsmi şəxslər basqın edib. Onlar polisə aparılıb, sonra ictimai qaydanı pozmaq əsası ilə cərimə ediliblər.
Ərizəçilər azadlıq və toxunulmazlıq, ədalətli məhkəmə araşdırması, dini etiqad azadlığı hüquqlarına müdaxilədən şikayət veriblər.
Sabiq səhiyyə naziri, 2005-2019-cu illərdə həbsdə olmuş Əli İnsanovun oğlu Vidadi İnsanovun şikayəti üzrə anlaşma əldə edildiyi açıqlanıb. Anlaşmaya əsasən, Azərbaycan dövləti ərizəçiyə 5000 avro təzminat, 1000 avro xərc və məsrəf əvəzi ödəyəcək.
Bu şikayət ərizəçinin ölkədən çıxışına qadağa qoyulması ilə bağlıdır. Vidadi İnsanov hərəkət azadlığı hüququnun pozuntusuna yol verildiyini iddia edib.
1949-cu ildə yaradılan Avropa Şurasının əsas institutlarından biri hakimləri üzv ölkələrdən seçilən Avropa İnsan Hüquqları Məhkəməsidir. Məhkəmə Avropa İnsan Hüquqları Konvensiyana riayət olunmasını həyata keçirir.
Azərbaycan Avropa Şurasına 2001-ci ildə qoşulub.
