Ukrayna yığmasının yeni geyimi, Rusiyanın narazılığı

UEFA 16-cı Avropa futbol çempionatında iştirak edən Ukrayna milli komandasının yeni geyim formasını təsdiqləyib.

Novator.az saytı “Reuters” agentliyinə istinadla bildirir ki, yığma üzvlərinin köynəyində (futbolkalarda) Rusiyanın ilhaq etdiyi Krım da daxil olmaqla Ukraynanın xəritəsi həkk olunub, hərbi salamlama şüarları – “Yaşasın Ukrayna!” və “Yaşasın qəhrəmanlar!” yazılıb.

Ukrayna millisinin geyimi Rusiyada narazılıqla qarşılanıb. Rusiyalı deputat Dmitri Svişyev yeni formanı “siyasi təbliğat” adlandıraraq deyib ki, “Rusiya ərazisini Ukrayna xəritəsinə aid etmək” qanunsuzluqdur.

Rusiya Xarici İşlər Nazirliyinin sözçüsü Mariya Zaxarova isə sosial şəbəkədə yaydığı açıqlamasında idman köynəyinə “Yaşasın Ukrayna!” və “Yaşasın qəhrəmanlar!” şüarlarının yazılmasını “alman nasizmi ilə həmrəyliyə çağırış” kimi qiymətləndirib.

2014-cü ilin fevralında Ukraynada hakimiyyət xalq üsyanı ilə dəyişib, Rusiyanın adamlarını Qərbə yaxın qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib, ölkənin şərqindəki iki separatçı rejimin əli ilə Donetsk və Luqansk vilayətlərinin bir hissəsini işğal edib.

16-cı Avropa futbol çempionatı iyunun 11-də start götürür. Ukrayna milli komandası C qrupunda Niderland, Avstriya, Şimali Makedoniya ilə yarışacaq. Qrupun oyunları Amsterdam və Buxarestə salınıb.