13-cü matç
Azərbaycanın milli futbol komandası iyunun 6-sı Kişinyovda Moldova yığması ilə yoldaşlıq matçı keçirib. Oyunda meydan sahibləri üstün gəlib – 1:0.
Novator.az bildirir ki, Azərbaycan milli komandasına 2020-ci il iyulun 10-dan italyan Canni De Byazi baş məşqçilik edir. Onun rəhbərliyi altında əvvəl keçirilmiş 12 matçda 2 qələbə əldə olunub, 6 görüş uduzulub.
2020-ci ildə UEFA Millətlər Liqasının qrup raundunda Lüksemburqla 1:2 və 0:0, Kiprlə 0:0 və 1:0, Monteneqro ilə 0:0 və 0:2 hesabları qeydə alınıb.
Həmin il Sloveniya ilə yoldaşlıq görüşü qolsuz bitib.
2021-ci ildə yığma dünya çempionatının seçmə mərhələsində Portuqaliyaya (0:1) və Serbiyaya (1:2) yenilib.
Üç oyun yoldaşlıq görüşü olub. Milli komanda Qətər və Türkiyəyə 1:2 hesabı ilə uduzub, Belarusu həmin hesabla yenib.
1956-cı il təvəllüdlü Canni De Byazi futbolçu karyerası ərzində ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olub.
Məşqçi kimi Canni De Byazi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.
Azərbaycan milli komandasının sükanı arxasında 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov, 1999-2000-ci illərdə Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov, 2019-cu ildə Nikola Yurçeviç dayanıb.
