İyunun 18-i İranda prezident seçkisi keçiriləcək. Novator.az GünAzTV-yə istinadla bildirir ki, 7 nəfərin namizədliyi qeydə alınıb: İbrahim Rəisi, Möhsün Rzayi, Möhsün Mehrəlizadə, Səid Cəlili, Əlirza Zakani, Əbdülnasir Hemməti, Əmir Hüseyn Qazızadə Haşimi.

Qələbəyə ən şanslı namizəd kimi qatı mühafizəkar, İran Məhkəmə Sisteminin rəisi, siyasi və milli fəallara qarşı amansız repressiyalarla tanınan İbrahim Rəisi göstərilir. 1960-cı il təvəllüdlü İbrahim Rəisi əvvəllər paytaxt Tehranın prokuroru və ölkənin baş prokuroru olub.

Hökumət başçısı funksiyası daşıyan İran prezidenti ümumxalq seçkisində 4 il müddətinə seçilir. 2013 və 2017-ci illərin seçkilərində Həsən Ruhani qalib gəlib. 1948-ci il təvəllüdlü Həsən Ruhani parlamentin üzvü olub, Silahlı Qüvvələrdə rəhbər postlar tutub, Ali Milli Təhlükəsizlik Şurasının rəhbəri vəzifəsində fəaliyyət göstərib, Üləma Məclisində, Sistemin Məsləhətini Müəyyənləşdirən Qurumda təmsil edilib.

Prezident vəzifəsinin yaradıldığı 1980-ci ildən bəri həmin kürsüdə Əbülhəsən Bənisədr, Məhəmmədəli Rəcai, Əli Xamneyi (indiki ali dini lider, dövlət başçısı), Haşimi Rəfsəncani, Məhəmməd Xatəmi, Mahmud Əhmədinejad da əyləşiblər.