“Binəqədi” yenilənib
İyunun 3-də prezident İlham Əliyev Bakının Binəqədi rayonunda “Azərenerji” Açıq Səhmdar Cəmiyyətinin yenidən qurulan “Binəqədi” yarımstansiyasının açılışında iştirak edib. AZƏRTAC xəbər verir ki, “Binəqədi” yarımstansiyası paytaxtın Binəqədi, Nərimanov, Nəsimi rayonlarının elektrik enerjisi təchizatının təmin olunmasında mühüm rol oynayır.
Arayışa görə, Abşeron Regional Elektrik Şəbəkəsinin ərazidə yerləşən inzibati binası da yenidən qurulub, “Azərenerji”nin xüsusi təyinatlı maşın-mexanizmləri üçün nəqliyyat sahəsi və onlara təmir xidməti göstərəcək sahələr yaradılıb, müxtəlif relyeflərdə, ağır şəraitdə işləyə biləcək xüsusi təyinatlı maşınlar alınıb, ərazidə transformatorların təmir sahəsi qurulub.
Dövlət başçısına işğaldan azad edilən Suqovuşan qəsəbəsində yenidən qurulması tam başa çatan “Suqovuşan-1” və “Suqovuşan-2” kiçik su elektrik stansiyalarında görülən işlər barədə də məlumat verilib.
