Azərbaycanın milli futbol komandası italiyalı Canni De Byazinin baş məşqçiliyi ilə 12-ci oyununu keçirib. İyunun 2-si Minskdə Belarus yığması ilə yoldaşlıq görüşü keçirən milli komanda 2:1 hesablı qələbə qazanıb.

Novator.az bildirir ki, Canni De Byazi milli komandaya 2020-ci il iyulun 10-dan baş məşqçilik edir. Onun rəhbərliyi altında əvvəl oynanmış 11 matçda 1 qələbə əldə olunub, 4 görüş sülhlə bitib, 6 görüş uduzulub.

2020-ci ildə UEFA Millətlər Liqasının qrup raundunda Lüksemburqla 1:2 və 0:0, Kiprlə 0:0 və 1:0, Monteneqro ilə 0:0 və 0:2 hesabları qeydə alınıb.

Həmin il Sloveniya ilə yoldaşlıq görüşü sükutla əlamətdar olub – 0:0.

2021-ci ildə yığma dünya çempionatının seçmə mərhələsində Portuqaliyaya (0:1) və Serbiyaya (1:2) yenilib.

İki oyun yoldaşlıq görüşü olub. Qətər və Türkiyə ilə 1:2 nəticələri qazanılıb.

1956-cı il təvəllüdlü Canni De Byazi futbolçu karyerası ərzində ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olub.

Məşqçi kimi Canni De Byazi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.

Azərbaycan milli komandasının sükanı arxasında 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov, 1999-2000-ci illərdə Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov, 2019-cu ildə Nikola Yurçeviç dayanıb.