Hasilat qərarı yenilənib
Əsas neft ixracçıları olan OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və qeyri-OPEK ölkələri (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) hasilat qərarını yeniləyib. Novator.az bildirir ki, nazirlərin iyunun 1-də keçirdiyi video formatlı konfransda hasilatı iyul ayından artırmaq qərarı qüvvədə saxlanıb. İlkin razılaşma aprelin 1-də əldə olunmuşdu. Həmin razılaşmaya görə, iyul ayında Azərbaycanın gündəlik xam neft hasilatı 620 min barrel olmalıdır.
Energetika Nazirliyi gündəlik xam neft hasilatını yanvar və fevralda 593 min barrel, martda 592,1 min barrel, apreldə 594 min barrel göstərib. Beynəlxalq razılaşmaya əsasən, Azərbaycan gündəlik hasilatı iyunda 610 min barrel həcmində saxlamalıdır.
Azərbaycanın 2021-ci il büdcəsində bir barrel neftin qiyməti 40 dollardan götürülüb. “AzəriLayt” markalı Azərbaycan nefti yanvara 50,92, fevrala 56,68, marta 65,66, aprelə 64,25, maya 66,55, iyuna 70,57 dollarla başlayıb.
2021-ci ilin birinci rübündə ölkədə təxminən 8,8 milyon ton neft (kondensatla birlikdə) çıxarılıb.
2008-ci ilin neft hasilatı 44,5 milyon ton, 2009-cu ilin hasilatı 50,4 milyon ton, 2010-cu ilin hasilatı 50,8 milyon ton həddində rəsmiləşib.
2011-ci ildə hasilat 45,6 milyon ton, 2012-ci ildə 43,4 milyon ton, 2013-cü ildə 43,5 milyon ton, 2014-cü ildə 42 milyon ton, 2015-ci ildə 41,6 milyon ton, 2016-cı ildə 41 milyon ton, 2017-ci ildə 38,7 milyon ton, 2018-ci ildə 38,8 milyon ton, 2019-cu ildə 37,4 milyon ton, 2020-ci ildə 34,5 milyon ton göstərilib.
