Avropa futbol çempionatının iştirakçıları
Novator.az 16-cı Avropa futbol çempionatına qatılan komandaların siyahısına nəzər salıb. Final mərhələsi iyunun 11-dən iyulun 11-dək keçiriləcək.
A qrupunda Türkiyə, İtaliya, Uels və İsveçrə yer alır. Oyunlar Bakı və Romada olacaq.
İtaliya 9 dəfə final mərhələsində oynayıb, 1 dəfə çempion olub, İsveçrə və Türkiyə 4 dəfə, Uels 1 dəfə final mərhələsinə çıxıb.
B qrupuna Danimarka, Finlandiya, Belçika, Rusiya düşüb. Oyunların ev sahibi Kopenhagen və Sankt-Peterburqdur.
Danimarka 8 dəfə final mərhələsində oynayıb, 1 dəfə çempion olub, Belçika və Rusiya 5 dəfə final mərhələsinə çıxıb, Finlandiya debütantdır.
C qrupunda Niderland, Ukrayna, Avstriya, Şimali Makedoniya var. Oyunlar Amsterdam və Buxarestə salınıb.
Niderland 9 dəfə final mərhələsində oynayıb, 1 dəfə çempion olub, Ukrayna və Avstriya 2 dəfə final mərhələsinə çıxıb, Şimali Makedoniya debütantdır.
D qrupunda İngiltərə, Xorvatiya, Şotlandiya, Çexiya yer alır. Oyunlar Qlazqo və Londonda keçiriləcək.
İngiltərə 9 dəfə, Çexiya 6 dəfə, Xorvatiya 5 dəfə, Şotlandiya 2 dəfə final mərhələsində oynayıb.
E qrupunda İspaniya, İsveç, Polşa, Slovakiya var. Oyunlar Sankt-Peterburq və Sevilyaya salınıb.
İspaniya 10 dəfə final mərhələsində oynayıb, 3 dəfə çempion olub, İsveç 6 dəfə, Polşa 3 dəfə, Slovakiya 1 dəfə final mərhələsinə çıxıb.
F qrupunun tərkibi belədir: Macarıstan, Portuqaliya, Fransa, Almaniya. Oyunlara Budapeşt və Münhen ev sahibliyi edir.
Almaniya 12 dəfə final mərhələsində oynayıb, 3 dəfə çempion olub, Fransa 9 dəfə final mərhələsində oynayıb, 2 dəfə çempion olub, Portuqaliya 7 dəfə final mərhələsində oynayıb, 1 dəfə çempion olub, Macarıstan 3 dəfə final mərhələsinə çıxıb.
1/8 finala qrupda ilk iki yeri tutan komandalar və üçüncü yerdə qərarlaşan komandaların dördü vəsiqə alacaq.
1960-cı ildə SSRİ, 1964, 2008, 2012-ci illərdə İspaniya, 1968-ci ildə İtaliya, 1972, 1980, 1996-cı illərdə Almaniya, 1976-cı ildə Çexoslovakiya, 1984, 2000-ci illərdə Fransa, 1988-ci ildə Niderland, 1992-ci ildə Danimarka, 2004-cü ildə Yunanıstan, 2016-cı ildə Portuqaliya Avropa çempionu olub.
