Azərbaycanın Müdafiə Nazirliyi yenilənmiş məlumat yayıb. Rəsmi xəbərə görə, mayın 27-nə keçən gecə, saat 3 radələrində Ermənistan silahlı qüvvələrinin kəşfiyyat-diversiya qrupları Kəlbəcər rayonu sahəsində Azərbaycan sərhədini keçib, ərazidə minalama işləri və digər təxribat əməllərini aparmağa cəhd göstərib: “İlkin məlumata əsasən, iki kəşfiyyat-diversiya qrupu dövlət sərhədini iki istiqamətdə keçib. Qruplardan biri 9, digəri 15 hərbi qulluqçudan ibarət olub. Kəşfiyyat-diversiya qruplarının hərəkəti nəzarətə götürülüb. Azərbaycan Ordusunun bölmələri ərazimizdəki təminat və digər keçid yollarında minalama fəaliyyəti həyata keçirən düşmənin hər iki qrupuna qarşı dərhal əməliyyat tədbirləri görüb. Düşmənin birinci kəşfiyyat-diversiya qrupundan 1-i zabit olmaqla 4, digərindən isə 2 hərbi qulluqçu tərksilah edilərək saxlanıb. Digər erməni hərbi qulluqçuları ərazimizi dərhal tərk edərək geriyə çəkiliblər”.
