“Lider” qapadılır. Başqa qərarlar da var
Milli Televiziya və Radio Şurası “Lider TV və Radio-Azərbaycan” MMC-nin lisenziyasını geri alıb. 24 may iclasında çıxarılan qərar MMC-nin müflisləşməsi ilə əsaslandırılıb.
“Lider” televiziyası və radiosunun yayımı 1 iyun 2021-ci ildə dayandırılacaq.
Novator.az bildirir ki, “Lider TV və Radio-Azərbaycan” MMC 1998-ci ildə qeydiyyatdan keçib. 2020-ci ilin iyun ayında Bakı Kommersiya Məhkəməsi Nəqliyyat, Rabitə və Yüksək Texnologiyalar Nazirliyinin “Radio-Televiziya Yayımı və Peyk Rabitəsi” İstehsalat Birliyinin iddiası ilə MMC-ni müflis elan edib.
Rəsmi məlumata görə, Milli Televiziya və Radio Şurasının 24 may iclasında “Dalğa TV” peyk televiziya yayımının ardıcıl olaraq 30 gündən artıq müddətdə həyata keçirilmədiyi, “Mingəçevir TV” və “ARB Ulduz TV” regional televiziya yayımının bir il ərzində 60 gün əsassız həyata keçirilmədiyi nəzərə alınaraq bu televiziya yayımçılarının lisenziyalarına xitam verilib.
Milli Televiziya və Radio Şurası 2002-ci ildə televiziya və radio yayımı sahəsində dövlət siyasətinin həyata keçirilməsini təmin etmək və bu fəaliyyəti tənzimləmək məqsədilə yaradılıb.
Dövlət büdcəsindən maliyyələşdirilən 9 nəfərlik şuranın üzvlərini prezident təyin edir. Üç nəfərin səlahiyyət müddəti 2 il, üç nəfərinki 4 il, üç nəfərinki 6 ildir.
Hazırda şuraya İsmət Səttarov sədrlik edir.
Azərbaycanda “Lider”lə yanaşı bütün ölkədə yayılan bu televiziyalar var: AzTV, “Mədəniyyət”, “İdman TV”, İctimai Televiziya, ATV, “Space”, “Xəzər”, ARB, ARB 24, “CBC Sport”, “Real TV”.
