Azərbaycana dəstək, Azərbaycanın dəstəyi
Azərbaycanı “Avroviziya 2021” mahnı müsabiqəsində təmsil edən müğənni Samirə Əfəndi 26 iddiaçının qatıldığı finalda 20-ci yeri tutub.
Yarışmaya Niderlandın Rotterdam şəhəri ev sahibliyi edib, yarımfinallar mayın 18-i və 20-də, final mayın 22-də keçirilib. Qalib 39 iştirakçı ölkənin hər birindən 5 münsifin səsverməsi və tamaşaçıların SMS dəstəyi əsasında müəyyənləşib. Qaydalara görə, hər iki istiqamət üzrə maksimum xal 12-dir.
Novator.az bildirir ki, Samirə Əfəndi finalda 65 xal qazanıb, bunun 32-si münsiflərdən, 33-ü tamaşaçılardan gəlib.
Azərbaycanlı müğənniyə ən yüksək xalı rusiyalı münsiflər verib: 8 xal.
Moldovalı münsiflər Azərbaycan təmsilçisini 6, gürcüstanlı münsiflər 5, ukraynalı münsiflər 3, albaniyalı, irlandiyalı, israilli, isveçrəli və niderlandlı münsiflər 2 xalla qiymətləndirib.
Tamaşaçılardan Azərbaycan təmsilçisinə ən böyük dəstək Bolqarıstan, Rumıniya, Rusiya və Serbiyadan olub: 4 xal.
Samirə Əfəndi Gürcüstan, Şimali Makedoniya və Ukraynadan 3 xal, Xorvatiya, İsrail və Yunanıstandan 2 xal, Moldova və Norveçdən 1 xal əldə edib.
Azərbaycanlı münsiflər Rusiya təmsilçisinə 12, Yunanıstan təmsilçisinə 10, Moldova təmsilçisinə 8 xal verib.
Malta Azərbaycan münsiflərindən 7, Ukrayna 6, İsveç 5, Fransa 4, Belçika 3, Portuqaliya 2, Bolqarıstan 1 xal alıb.
Azərbaycanlı tamaşaçıların dəstəyi belə sıralanıb:
İsrail – 12 xal
İtaliya – 10 xal
Ukrayna – 8 xal
Rusiya – 6 xal
Finlandiya – 5 xal
İsveçrə – 4 xal
San Marino – 3 xal
Fransa – 2 xal
Moldova – 1 xal.
“Avroviziya 2021” mahnı müsabiqəsi finalda münsiflərdən və tamaşaçılardan ümumilikdə 524 xal alan İtaliyanın “Maneskin” qrupunun qələbəsi ilə başa çatıb.
İctimai teleradioları bir araya gətirən Avropa Yayım Birliyinin 1956-cı ildən keçirdiyi “Avroviziya” yarışında indiyəcən 27 ölkə birincilik əldə edib. 1969-cu ildə qələbə eyni vaxtda dörd ölkəyə (Böyük Britaniya, Fransa, İspaniya, Niderland) verilib. Buna görə də 65 dəfə keçirilmiş yarışın 68 qalibi var.
1956-cı ildən bəri İrlandiya 7, İsveç 6, Böyük Britaniya, Fransa, Lüksemburq, Niderland 5, İsrail 4, Danimarka, İtaliya, Norveç 3, Almaniya, Avstriya, İspaniya, İsveçrə, Ukrayna 2 dəfə qalib olub.
Azərbaycan, Belçika, Estoniya, Finlandiya, Latviya, Monako, Portuqaliya, Rusiya, Serbiya, Türkiyə, Yuqoslaviya, Yunanıstan 1 uğur əldə edib.
Azərbaycan “Avroviziya”ya 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü, 2019-cu ildə Çingiz Mustafayev 8-ci yeri tutub.
“Avroviziya 2018”dəki təmsilçi Aysel Məmmədova yarımfinalda ələnib.
