“Avroviziya 2021”ə italyan möhürü
“Avroviziya 2021” mahnı müsabiqəsi İtaliyanın “Maneskin” qrupunun qələbəsi ilə başa çatıb. Novator.az-ın məlumatına görə, “Maneskin” mayın 22-si Niderlandın Rotterdam şəhərində, “Ahoy” sarayında keçirilən finalda münsiflərdən və tamaşaçılardan 524 xal alıb.
Azərbaycan təmsilçisi Samirə Əfəndi 26 iddiaçının qatıldığı finalda 65 xal yığaraq 20-ci yeri tutub.
İctimai teleradiolar qurumu – Avropa Yayım Birliyinin layihəsi olan “Avroviziya”da 1956-cı ildən bəri İrlandiya 7, İsveç 6, Niderland, Fransa, Lüksemburq, Böyük Britaniya 5, İsrail 4, Danimarka, İtaliya, Norveç 3, İsveçrə, Avstriya, İspaniya, Almaniya, Ukrayna 2 dəfə qalib olub.
Monako, Belçika, Yuqoslaviya, Estoniya, Latviya, Türkiyə, Yunanıstan, Finlandiya, Serbiya, Rusiya, Azərbaycan, Portuqaliya 1 uğur əldə edib.
Azərbaycan “Avroviziya”ya 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü, 2019-cu ildə Çingiz Mustafayev 8-ci yeri tutub.
“Avroviziya 2018”dəki təmsilçi Aysel Məmmədova yarımfinalda ələnib.
