Sərhəd olayı: İran vətəndaşı zərərsizləşdirilib
Mayın 15-i saat 16 radələrində Yardımlı rayonunun Gendərə kəndi yaxınlığındakı sərhəd zastavasının xidməti sahəsində 3 naməlum şəxs dövlət sərhədini pozmuş, onların açdığı atəş nəticəsində baş leytenant Eyvazov Samir Elmar oğlu və kiçik gizir Alimov Fərid Elçin oğlu həlak olmuş, hadisə yerində təxminən 10 kiloqram narkotik vasitəyə bənzər maddələr aşkarlanmış, həmin gün sərhəd pozucularından biri tutulmuşdu.
Mayın 19-da Baş Prokurorluq, Daxili İşlər Nazirliyi və Dövlət Sərhəd Xidməti birgə məlumat yayaraq bəyan edib ki, tutulan şəxs – İran vətəndaşı Həsənəli Bərgi təqsirləndirilən şəxs qismində cəlb edilib, barəsində həbs qətimkan tədbiri seçilib: “Bu gün saat 10 radələrində Daxili Qoşunların və Dövlət Sərhəd Xidmətinin keçirdiyi əməliyyat nəticəsində cinayət hadisəsinin digər iştirakçılarından biri – İran vətəndaşı Əllahbəxş Ağayinin Yardımlı rayonu ərazisində gizləndiyi yer müəyyən edilib, o, təslim olmayaraq silahlı müqavimət göstərdiyindən silah tətbiq edilməklə zərərsizləşdirilib.
Prokurorluq əməkdaşlarının hadisə yerinə keçirdiyi baxış zamanı 1 ədəd “AK 74” silahı, onun komplekt hissəsi – içərisində 20 ədəd patronu olan 1 ədəd daraq, odlu silaha aid gilizlər və iş üçün əhəmiyyət kəsb edən digər maddi sübutlar aşkar edilərək götürülüb, Əllahbəxş Ağayinin meyitinin müayinəsindən ötrü məhkəmə-tibbi ekspertiza təyin olunub.
Hazırda cinayətin digər iştirakçısının şəxsiyyətinin müəyyənləşdirilərək istintaqa cəlb edilməsi, habelə işin digər hallarının araşdırılması istiqamətində intensiv istintaq və əməliyyat-axtarış tədbirləri davam etdirilir”.
