Müsavatçıların piketi dağıdılıb VİDEO
Müsavat Partiyasının bir qrup üzvü mayın 8-i Bakıda, Rusiyanın Azərbaycandakı səfirliyi önündə piket keçirməyə cəhd göstərib. Aksiyanın məqsədi Rusiyanın Yuxarı Qarabağdakı sülhməramlılarının mayın 9-da Xankəndi şəhərində parad keçirmək niyyətinə etiraz bildirmək olub.
Müsavat başqanı Arif Hacılının yaydığı açıqlamaya görə, polis əməkdaşları piketi amansızlıqla dağıdıb, həbslər aparıb: “Rusiyanın Qarabağda yerləşdirdiyi hərbi kontingenti mandatına uyğun olmayan fəaliyyətlər göstərir. Mayın 9-u Xankəndidə hərbi paradın keçirmək planı da bunlardan biridir”.
Qarabağ Komitəsindən etiraz və təklif
Rəsmi: Xankəndidə təntənəli düzülüş olacaq
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib, ərazidə özünü müstəqil dövlət sayan Dağlıq Qarabağ rejimi qurulub.
2020-ci il sentyabrın 27-dən Azərbaycanın apardığı hərbi əməliyyatlarda ərazilərin bir qismi azad olunub.
Noyabrın 10-na keçən gecə hərbi əməliyyatlar dayandırılıb, Yuxarı Qarabağda təmas xətti və Laçın yolu boyu Rusiyanın sülhməramlı kontingenti yerləşdirilib, dekabrın 1-dək işğalçılar Azərbaycan ərazilərinin bir hissəsindən də çıxıblar.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi Rusiya Ordusu bölmələrinin əlindədir.
Azərbaycanın Müdafiə Nazirliyi mayın 8-də açıqlama yayaraq bildirib ki, mayın 9-u, faşizm üzərində qələbənin 76-cı ildönümündə müxtəlif tədbirlər keçiriləcək, həmçinin Rusiya sülhməramlı qüvvələrinin Xankəndi şəhərində təntənəli sıra düzülüşü planlaşdırılır.
1939-cu ildə Almaniya və müttəfiqləri İkinci Dünya müharibəsinə başlayıb. 1941-ci ildə Almaniya SSRİ-yə hücum edib, bu müharibə 1945-ci il mayın 9-da SSRİ və müttəfiqlərinin qələbəsi ilə bitib. Həmin müharibədə Azərbaycandan 600 mindən çox adam döyüşüb, onların təxminən yarısı həlak olub.
Mayın 9-u Azərbaycanda rəsmi dövlət bayramı – Faşizm Üzərində Qələbə Günüdür.
