Məhkəmə-Hüquq Şurasının 7 may məlumatına görə, qurumun video formatında keçirilən iclasında bildirilib ki, 120-dək hakimin fəaliyyətinin qiymətləndirilməsi məqsədilə məhkəmələrin rəyləri, Ədliyyə Nazirliyinin məlumatları, başqa materiallar toplanıb, təhlillər aparılıb. İclasda həmin hakimlər barədə materiallar müzakirə olunub, 14 nəfərin fəaliyyətində peşəkar çatışmazlıqlar üzə çıxıb, onlara işdə dönüş yaratmaları üçün 6 ay vaxt qoyulub, 3 nəfərin səlahiyyətlərinə xitam verilməsi qərara alınıb.
Şura hakimlər barədə intizam icraatı üzrə işlərə də baxıb, Şirvan Apellyasiya Məhkəməsinin hakimləri Nüsrət Mirzəyev və Tofiq Heydərova töhmət verilib, Bakının Nizami Rayon Məhkəməsinin hakimi Mətanət Hacıyevaya irad tutulub.
Novator.az bildirir ki, məhkəmə hakimiyyətinin özünüidarə funksiyalarını həyata keçirən orqan kimi 2005-ci ildə fəaliyyətə başlayan Məhkəmə-Hüquq Şurasına ədliyyə naziri, Ali Məhkəmənin sədri, prezidentin, Milli Məclisin, Ədliyyə Nazirliyinin, Baş Prokurorluğun, Vəkillər Kollegiyasının Rəyasət Heyətinin təyin etdiyi şəxslər, Konstitusiya Məhkəməsinin təyin etdiyi hakim, Ali Məhkəmənin, apellyasiya məhkəmələrinin, birinci instansiya məhkəmələrinin hakimləri, Naxçıvan Muxtar Respublikası Ali Məhkəməsinin hakimi daxildir.
Yarandığı gündən Məhkəmə-Hüquq Şurasına ədliyyə naziri Fikrət Məmmədov sədrlik edir.
