Qorxmaz Hüseynov postdan getdi
Qorxmaz Cavanşir oğlu Hüseynov “Azərsu” Açıq Səhmdar Cəmiyyətinin sədri vəzifəsindən azad edilib. Prezident İlham Əliyev sərəncamı mayın 4-də imzalayıb.
Novator.az bildirir ki, “Azərsu” istehlakçıları mərkəzləşdirilmiş qaydada içməli su ilə təchiz edən və onlara kanalizasiya xidmətləri göstərən qurumdur, suyun mənbələrdən götürülməsi, emalı, nəqli və satışını təşkil edir, tullantı sularının təmizlənməsini həyata keçirir, təmizləyici qurğuların, anbarların, nasos stansiyalarının, su kəmərlərinin, kanalizasiya kollektorlarının layihələndirilməsi, inşası, istismarı ilə məşğul olur, onlara texniki xidmət göstərir.
Qorxmaz Hüseynov 1965-ci ildə Cəbrayıl rayonunun İsaqlı kəndində doğulub. İndiki Azərbaycan Dövlət Neft və Sənaye Universitetini və Dövlət İdarəçilik Akademiyasını bitirib.
1989-cu ildən neft sənayesində çalışıb, “Xəzərdənizneftqaztikinti” trestinin müdiri, Dövlət Neft Şirkətinin Sosial İnkişaf İdarəsinin rəisi, vitse-prezidenti olub.
“Azərsu”ya 16 fevral 2011-ci ildən rəhbərlik edirdi.
