Yerli məhsul daha çox bahalaşır
Dövlət Statistika Komitəsinin hesabatına görə, yanvar-mart aylarında istehlak qiymətləri 2020-ci ilin eyni dövrü ilə müqayisədə 3,9 faiz yüksəlib, ərzaq məhsulları, içkilər və tütün məmulatları 4,8 faiz, qeyri-ərzaq malları 3,6 faiz, əhaliyə göstərilən ödənişli xidmətlər 2,6 faiz bahalaşıb.
Novator.az bildirir ki, pərakəndə satış şəbəkəsində ərzaq məhsullarının qiyməti üzrə statistikaya nəzər salan iqtisadçı Rövşən Ağayev yerli məhsulların idxal mallarına nisbətən daha çox bahalaşdığını yazır: “2021-ci ilin yanvarına nisbətən mart ayının sonuna yerli buğda unu 3,8%, eyni idxal məhsulu 0,6% dəyər artırıb. Yerli pryanikdə bahalaşma 5%, idxal məhsulunda 0,3%-dir. Yerli vaflinin qiyməti 6,6%, idxal məhsulunun qiyməti 1% qalxıb.
Yerli toyuq əti 3,4% bahalaşıb, idxal məhsulu 0,3% ucuzlaşıb. Strelizə olunmuş yerli südün qiyməti 2,8%, eyni idxal məhsulunun qiyməti 0,9% yüksəlib. Yerli qarğıdalı yağı 13,1%, idxal məhsulu 5,7% dəyər artırıb.
Siyahını xeyli uzatmaq olar. Amma bu mənzərə onu göstərir ki, yerli məhsulların idxal analoqlarına nisbətən daha yüksək templə bahalanması həm qida sektorunun rəqabət qabiliyyətini azaldır, həm də qida seqmenti üzrə milli valyutanın real dəyərini artırır. Bir çox ölkədə milli valyutanın real məzənnəsi həm də ayrı-ayrı məhsul seqmentlərinə münasibətdə ayrıca hesablanır”.
