Neft Fondunun aktivləri azalıb
Dövlət Neft Fondu (DNF) rüblük hesabat yayıb. Məlumata görə, 2021-ci ilin yanvar-mart aylarında büdcə gəlirləri 3 milyard 182,1 milyon manat, büdcə xərcləri 2 milyard 519,9 milyon manat həddində rəsmiləşib.
Üç ayda 2021-ci ilin dövlət büdcəsinə 2 milyard 513,7 milyon manat vəsait köçürüldüyü, 2019-2023-cü illər üçün Azərbaycanda ali təhsil sisteminin beynəlxalq rəqabətliliyi üzrə dövlət proqramına 700 min manat vəsait yönəldildiyi bildirilir, qurumun idarə edilməsi ilə bağlı xərclər 5,5 milyon manat göstərilir.
Hesabata əsasən, aprelin 1-nə fondun aktivləri 2021-ci ilin əvvəlinə nisbətən 1,84% azalaraq 42 milyard 761,3 milyon ABŞ dollarına bərabər olub.
Aktivlərin azalması qızılın qiymətinin düşməsi və investisiya portfelinin tərkibində yer alan əsas valyutaların məzənnələrinin ABŞ dollarına qarşı zəifləməsi ilə izah edilir.
Dövlət Neft Fondunun 2021-ci il büdcəsinin gəlirləri 8 milyard 1 milyon 169,1 min manat, xərcləri 12 milyard 249 milyon 435,5 min manat məbləğində təsdiqlənib.
