Mehmanxanaların gəlirləri 43,1 faiz azalıb
Dövlət Statistika Komitəsi mehmanxana və bu tipli müəssisələrin fəaliyyəti haqqında hesabat yayıb. Novator.az bildirir ki, rəsmi açıqlamaya görə, 2021-ci ilin yanvar-mart aylarında Azərbaycanın mehmanxanalarında gecələmə sayı 2020-ci ilin eyni dövri ilə müqayisədə 36,9 faiz azalıb, 299,5 min gecələmə qeydə alınıb, onların 48,5 faizi Bakının, 11,2 faizi Qusarın, 10,6 faizi Qəbələnin, 5,4 faizi Qubanın, qalanı digər şəhər və rayonların payına düşüb.
Əcnəbilər və vətəndaşlığı olmayan şəxslərin mehmanxanalarda keçirdiyi gecələmələrin sayının 2020-ci ilin ilk üç ayına nəzərən 5,9 dəfə azaldığı vurğulanır.
Hesabata əsasən, 2021-ci ilin yanvar-mart aylarında mehmanxanaların gəlirləri 2020-ci ilin müvafiq dövrü ilə müqayisədə 43,1 faiz azalaraq 34,1 milyon manat olub.
