Cərimə pulundan istifadə qaydası
Nazirlər Kabineti cərimə və islah işləri növlərində cəzaların, habelə hüquqi şəxslərə tətbiq edilən cərimə növündə cinayət-hüquqi tədbirlərin icrası üzrə vəsaitdən istifadə qaydasını təsdiqləyib. Novator.az bildirir ki, sənəd 43 faiz məbləğində vəsaitdən istifadəni tənzimləyir. Vəsait Ədliyyə Nazirliyi Aparatının Probasiya Xidmətinin, Naxçıvan Muxtar Respublikasının Ədliyyə Nazirliyi Aparatının Probasiya Qurumunun və yerli probasiya qurumlarının işçilərinin sosial müdafiəsinin gücləndirilməsi, həmçinin Probasiya Xidmətinin maddi-texniki bazasının möhkəmləndirilməsinə yönəldilir.
Vəsaitin toplanması və təyinatı üzrə istifadə edilməsi Ədliyyə Nazirliyinin və Naxçıvan Muxtar Respublikasının Ədliyyə Nazirliyinin müvafiq xəzinə hesabları vasitəsilə həyata keçirilir. Uçot Maliyyə Nazirliyinin təsdiq etdiyi qaydalara uyğun həyata keçirilir. Köçürmələrin və bununla əlaqədar nəzarətin həyata keçirilməsini Ədliyyə Nazirliyi, Maliyyə Nazirliyi və Naxçıvan Muxtar Respublikasının Ədliyyə və Maliyyə nazirlikləri təmin edir. Maliyyə Nazirliyinə və Naxçıvan Muxtar Respublikasının Maliyyə Nazirliyinə müvafiq hesabatlar təqdim olunur.
Vəsaitin 50 faizi probasiya işçilərinə hər ay əməkhaqqına əlavələr formasında verilməklə istifadə edilir. Qalan vəsait Probasiya Xidmətinin maddi-texniki bazasının möhkəmləndirilməsinə gedir.
