24678 nəfər kompensasiya alıb
Əmanətlərin Sığortalanması Fondunun son hesabatına görə, qapadılmış “Atabank”, “Amrah Bank”, “AGBank” və “NBCBank” banklarının əmanətçilərinə qorunan əmanətlər üzrə ümumilikdə 639,7 milyon manatdan çox kompensasiya ödənib. Ödəniş alanların ümumi sayı 24678 nəfər göstərilir.
Mərkəzi Bank “Atabank”, “Amrah Bank”, “AGBank” və “NBCBank”ın lisenziyalarını 2020-ci ilin aprel-may aylarında ləğv edib. Banklarda əhalinin qorunan əmanətlərinin ümumi məbləği 686 milyon manatdır.
Əmanətçilərinə kompensasiyaların ödənməsinə 2020-ci ilin iyun ayında başlanıb.
2021-ci il aprelin 5-də “Əmanətlərin tam sığortalanması haqqında” qanunun tətbiq müddəti başa çatıb. Novator.az bildirir ki, 2016-cı ildən qüvvədə olan qanun illik faiz dərəcəsi milli valyutada 12 faizdən, xarici valyutada 2,5 faizdən yüksək olmayan əmanətləri əhatə edib.
“Əmanətlərin sığortalanması haqqında” qanuna əsasən, 5 aprel 2021-ci ildən fiziki şəxslərin qorunan əmanətləri üzrə kompensasiya məbləği 100 min manat (xarici valyutada 100 min manat ekvivalentində) olub. Həmin günədək fiziki şəxslərin qorunan əmanətləri üzrə kompensasiya məbləği 30 min manat idi.
Həmçinin sahibkarlıq fəaliyyəti ilə məşğul olan fiziki şəxslərin bank hesablarındakı vəsaitlərin maksimum 20 min manatı, notariusların depozit hesablarında qalmış, fiziki şəxslərə məxsus pul vəsaitləri tam məbləğdə sığortalanıb.
