Yüksəklik qərarında yenilik
Nazirlər Kabinetinin 22 avqust 2002-ci il qərarı dəniz səviyyəsindən hündürlükdə yerləşən müəssisə, idarə, təşkilatlarda və ya iş yerlərində çalışan işçilərin maaşına artımları nəzərdə tutur. Hündürlük 1200 metrdən 1500 metrədək olduqda əməkhaqqına artımın (əmsalın) minimum miqdarı 1,1; 1500 metrdən 2000 metrədək olduqda 1,2; 2000 metrdən yuxarı olduqda 1,3 məbləğində müəyyən edilib.
Novator.az bildirir ki, Konstitusiya Məhkəməsi Plenumunun Əmək Məcəlləsinin 159-cu maddəsinin bəzi müddəalarının şərh edilməsinə dair qərarını əsas tutan Nazirlər Kabineti məcburi köçkünlər üçün istisnanı ləğv edib. Həmin istisna əraziləri işğal olunmuş rayonların büdcədən maliyyələşdirilən müəssisələrində və təşkilatlarında çalışan məcburi köçkünlərin əmək haqlarına yüksəkliyə görə tətbiq edilən artımın (əmsalın) minimum miqdarının həmin müəssisələrin və təşkilatların yerləşdiyi ərazilərdən asılı olmayaraq saxlanmasını nəzərdə tuturdu.
Yenilik qərarı aprelin 23-də imzalanıb.
