Yenə Pənahov
Aprelin 27-də yeni tərkibdə ilk iclasını keçirən Mərkəzi Seçki Komissiyasının (MSK) rəhbərliyi müəyyənləşib: Məzahir Pənahov sədr, Rövzət Qasımov sədr müavini, Arifə Muxtarova və Mikayıl Rəhimov katib seçiliblər.
Qanuna görə, 18 nəfərlik MSK-da yerlərin 6-nı parlamentdəki çoxluq partiyasının, 6-nı azlıqda qalan partiyaların, 6-nı partiyasız deputatların təqdim etdiyi nümayəndələr tutur.
2020-ci ildə formalaşan Milli Məclisin hazırda 120 deputatı var. Yeni Azərbaycan Partiyası 70, Vətəndaş Həmrəyliyi Partiyası 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Milli Cəbhə Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyası hərəyə 1 mandatla təmsil olunur. 38 deputat partiyasızdır.
MSK-nın yeni tərkibini aprelin 27-də parlament seçib.
Yeni Azərbaycan Partiyasını qurumda Məzahir Pənahov, Rövzət Qasımov, Şaitdin Əliyev, Ramiz İbrahimov, Validə Kazımova və Hüseyn Paşayev təmsil edir.
Azlıq partiyalarının nümayəndələri Mikayıl Rəhimov, Bəxşeyiş Əsgərov, Tofiq Həsənov, Almas Qəhrəmanlı, Etibar Quliyev və İlkin Şahbazovdur.
Partiyasız deputatlar MSK-ya Arifə Muxtarova, Fuad Cavadov, İlham Məmmədov, Nizami Nadirxanlı, Qabil Orucov və Nailə Əsgərovanı göndərib.
Novator.az bildirir ki, 1951-ci il təvəllüdlü Məzahir Pənahov fizika-riyaziyyat elmləri doktoru, professordur. MSK-ya 2000-ci ildən sədrlik edir. “Şöhrət” və “Şərəf” ordenləri laureatıdır.
Onun sədrliyi ilə 5 parlament seçkisi, 4 prezident seçkisi, 4 bələdiyyə seçkiləri, 3 referendum keçirilib.
