Bayden “soyqırımı” dedi
Aprelin 24-də ABŞ prezidenti Cozef Bayden XX əsrdə, Osmanlı İmperiyasının son çağlarında baş verən toqquşmalar zamanı ermənilərin üzləşdiyi hadisələri “soyqırımı” kimi qiymətləndirib.
Baydenə qədər həmin hadisələr barədə açıqlama yayan ABŞ prezidentləri “soyqırımı” yox, başqa ifadələr, məsələn, “böyük fəlakət” ifadəsini işlədərdi.
Cozef Bayden ABŞ-a 2021-ci il yanvarın 20-dən rəhbərlik edir. O, ölkəsindəki erməni lobbisinə yaxın, Türkiyəyə qarşı sərt mövqeyi olan siyasətçi kimi tanınır.
Erməni lobbisi uzun illərdir ABŞ prezidentinin Osmanlı İmperiyasının son çağlarında ermənilərə qarşı atılan addımları “soyqırımı” kimi qiymətləndirməsinə çalışırdı.
Novator.az saytı “Reuters” agentliyinə istinadla xəbər verir ki, 2021-ci il aprelin 24-də yaydığı açıqlamada Cozef Bayden bildirib: “Amerika xalqı 106 il qabaq aprelin 24-dən başlanan soyqırımı nəticəsində həlak olmuş ermənilərin xatirəsini yad edir. On illər ərzində erməni miqrantlar Birləşmiş Ştatları saysız-hesabsız üsullarla zənginləşdiriblər. Amma onlar heç vaxt faciəvi tarixi unutmayıblar. Biz onların tarixini yad edirik. Biz bu ağrını görürük. Biz tarixi təsdiqləyirik. Bunu ittiham məqsədilə yox, baş verənlərin bir daha təkrarlanmaması üçün edirik”.
Saxta soyqırımı iddialarına əsasən, 1915-ci il aprelin 24-dən başlayaraq 1923-cü ilə kimi Türkiyədə 1 milyon 500 min nəfər erməni öldürülüb. Bu iddiaları indiyədək bir çox ölkənin (Almaniya, Avstriya, Belçika, Çexiya, Danimarka, Fransa, İsveç, İsveçrə, İtaliya, Kipr, Litva, Lüksemburq, Niderland, Polşa, Portuqaliya, Rusiya, Slovakiya, Vatikan, Yunanıstan, ABŞ, Kanada, Argentina, Boliviya, Braziliya, Çili, Paraqvay, Uruqvay, Venesuela, Livan, Suriya və s.) qanunverici orqanları, bəzi beynəlxalq qurumlar tanıyıb.
Mənbə: Reuters.com
