Oqtay Şirəliyev səhiyyə naziri vəzifəsindən çıxarıldı
Aprelin 23-də sərəncam imzalayan prezident İlham Əliyev Oqtay Şirəliyevi səhiyyə naziri vəzifəsindən azad edib.
Novator.az bildirir ki, 1950-ci il avqustun 2-də doğulan Oqtay Şirəliyev indiki Azərbaycan Tibb İnstitutunu bitirib, Moskvada ordinatura və aspirantura təhsilləri alıb. Tibb elmləri doktorudur. Səhiyyə naziri postunu 2005-ci ilin oktyabr ayından tuturdu.
Dövlət başçısının başqa sərəncamları ilə Teymur Yusif oğlu Musayev səhiyyə nazirinin birinci müavini təyin olunub, ona nazir vəzifəsini müvəqqəti icra etmək səlahiyyəti verilib.
Səhiyyə nazirinin birinci müavini vəzifəsi aprelin 23-də prezident fərmanı ilə təsis olunub.
Teymur Musayev 16 sentyabr 1970-ci ildə Bakı şəhərində doğulub. Azərbaycan Tibb Universitetini bitirib.
Bakıdakı 16 saylı poliklinikada çalışıb, “H.T.P.” İsrail klinikasının Bakı filialının tibbi direktoru, Reproduktiv Sağlamlıq Proqramının direktor müavini olub, “Baku City Hospital”da həkim-uroloq, Nəsrəddin Tusi adına Klinikada həkim-uroloq, şöbə müdiri, baş həkimin müalicə işləri üzrə müavini, baş həkim, tibbi direktor, “Baku Dobromed Hospital”da tibbi direktor, “Chenot Palace Gabala”da tibbi direktor postlarını tutub, “Spero Hospital”da həkim-uroloq kimi fəaliyyət göstərib.
2020-ci ilin aprel ayından Səhiyyə Nazirliyinin səhiyyənin təşkili şöbəsinin müdiri idi.
Tibb elmləri namizədidir.
