Fərmanın icrasına qərar verildi
Prezident İlham Əliyev 6 aprel 2021-ci il fərmanı ilə Əqli Mülkiyyət Agentliyinin tabeliyində Texnologiyaların Kommersiyalaşdırılması və Transferi Mərkəzinin yaradılmasını tapşırmış, Nazirlər Kabinetinə bunun üçün 15 gün vaxt vermişdi. Aprelin 22-də Nazirlər Kabineti fərmanı icra edən qərar çıxarıb. Qərara görə, Texnologiyaların Kommersiyalaşdırılması və Transferi Mərkəzi elm və sənaye arasında bağlantı, qarşılıqlı sifariş və təklif münasibətlərinin yaradılması, ixtiraçılıq fəaliyyətinin keyfiyyətcə artması və tətbiqi xarakter daşıması üçün texnologiyaların transferini və əqli fəaliyyət nəticələrinin kommersiyalaşdırılmasını həyata keçirən, innovativ inkişafın, o cümlədən startap layihələrin dəstəklənməsinə xidmət edən, elmi tədqiqatların nəticələrinin kommersiya və qeyri-kommersiya məqsədilə istifadəsi üçün transferinə, həmçinin bu nəticələrdən gəlir əldə etməyə yönəldilən, müştərilərə texnologiyaların və layihələrin hədəf bazarlarına çıxarılması xidmətlərinin göstərilməsində, bu sahədə fəaliyyətin əlaqələndirilməsində iştirak edən publik hüquqi şəxsdir.
Novator.az bildirir ki, mərkəzin nizamnaməsinin və nizamnamə fondunun miqdarının təsdiqi, idarəetmə orqanlarının yaradılması, strukturunun müəyyən olunması Nazirlər Kabinetinin səlahiyyətindədir.
