Seçki qurumu seçim ərəfəsində
2020-ci ildə formalaşan Milli Məclisin hazırda 120 deputatı var. Yeni Azərbaycan Partiyası 70, Vətəndaş Həmrəyliyi Partiyası 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Milli Cəbhə Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyası hərəyə 1 mandatla təmsil olunur. 38 deputat partiyasızdır.
Yaxın günlərdə parlamentin Mərkəzi Seçki Komissiyası (MSK) üzvlərini seçməsi gözlənir. Qanuna görə, 18 nəfərlik MSK-da 6 yeri parlamentdəki çoxluq partiyasının, 6 yeri azlıq partiyalarının, 6 yeri partiyasız deputatların təqdim etdiyi nümayəndələr tutur. Partiyasız deputatların 1 namizədi çoxluq partiyasının nümayəndələri ilə, 1 namizədi azlıq partiyalarının nümayəndələri ilə razılaşdırılır.
Novator.az bildirir ki, 2000-ci ildən MSK-ya Məzahir Pənahov sədrlik edir. O, Yeni Azərbaycan Partiyasının nümayəndəsidir. Hakim partiyanı MSK-da təmsil edən digər şəxslər bunlardır: Rövzət Qasımov (sədr müavini), Şaitdin Əliyev, Ramiz İbrahimov, Validə Kazımova, Hüseyn Paşayev.
Azlıq partiyalarının MSK-dakı nümayəndələri Mikayıl Rəhimov (katib), Bəxşeyiş Əsgərov, Tofiq Həsənov, Almas Qəhrəmanlı, Etibar Quliyev və İlkin Şahbazovdur.
Partiyasız deputatları MSK-da Arifə Muxtarova (katib), Fuad Cavadov, İlham Məmmədov, Nizami Nadirxanlı, Qabil Orucov təmsil edir. Onların başqa bir təmsilçisi – Azər Tağıyev 2018-ci ildə dünyasını dəyişib. Novator.az-ın əldə etdiyi məlumata görə, partiyasız deputatlar boş yerə Nailə Əsgərovanı namizəd göstərib.
