Natamam hesabat
2021-ci ilin birinci rübündə İqtisadiyyat Nazirliyi yanında Dövlət Vergi Xidmətinin xətti ilə dövlət büdcəsinə 2 milyard 85,7 milyon manat vəsait daxil olub. Rəsmi hesabata əsasən, bu, proqnoza nisbətən 21,1 faiz, 2020-ci ilin eyni dövrü ilə müqayisədə 2,2 faiz çoxdur.
Qeyri-neft sektorundan daxilolmaların 7,9 faiz artdığı bildirilir.
İqtisadçı Rövşən Ağayev yazır ki, Dövlət Vergi Xidmətinin açıqladığı hesabat bir ildən çoxdur davam edən koronavirus pandemiyasının iqtisadi təsirlərini qiymətləndirmək, müstəqil, alternativ analiz aparmaq üçün yetərsizdir.
Novator.az-ın məlumatına görə, ekspert qeyd edir ki, vergi sistemində informasiya açıqlığı ilə bağlı ictimai gözləntilər özünü doğrultmur: “Əgər doğrulmuş olsa, indi nəticələr ən azından bu informasiyaları əldə etməyə imkan verərdi: vergi daxilolmalarının özəl sektor və dövlət sektoru üzrə həcmi və dinamikası; vergi daxilolmalarının sahələr üzrə (ticarət, sənayenin aparıcı sahələri, tikinti, ictimai-iaşə və s.) həcmi və dinamikası; vergi daxilolmalarının Bakı da daxil olmaqla əsas iri şəhərlər və ölkənin yerdə qalan regionları üzrə həcmi və dinamikası.
Qeyri-neft vergiləri dövlət sektoru hesabına da arta bilər. İndi necə bilək ki, biznesin vergi ödəmə imkanları pandemiya dövründə necə artıb? Yaxud pandemiyanın onsuz da zəif olan bölgə iqtisadiyyatına təsirini necə izləyək?”
