Kredit, əmanət, problemli kredit
Mərkəzi Bank kredit və əmanət hesabatları açıqlayıb. Novator.az-ın məlumatına görə, 2021-ci il aprelin 1-nə kredit məbləği 14 milyard 352,4 milyon manat, əmanət məbləği 8 milyard 147,5 milyon manat göstərilir.
Yanvarın 1-nə 14 milyard 157 milyon manat kredit, 8 milyard 177,9 milyon manat əmanət qeydə alınmışdı. Üç ayda kredit portfeli 195,4 milyon manat artıb, əmanətlər 30,4 milyon manat azalıb.
Başqa bir hesabata görə, aprelin 1-nə 918,2 milyon manat problemli kredit rəsmiləşib. Bu, ilin əvvəli ilə müqayisədə 25,1 milyon manat çoxdur. Yanvarın 1-nə problemli kreditlərin həcmi 893,1 milyon manat idi.
Rəsmi statistikaya əsasən, 2015-ci ilin əvvəlinə vaxtında qaytarılmayan kreditin məbləği 976,3 milyon manat olub.
2015-ci il fevralın 21-də və dekabrın 21-də baş vermiş iki devalvasiya ilə ABŞ dollarının rəsmi kursu 0,7844 manatdan 1,5594 manata yüksəlib. Bu, problemli kreditlərin artımına rəvac verib.
2016-cı ilin əvvəlinə 1 milyard 508,5 milyon manat məbləğində problemli kredit qeydə alınıb.
2017-ci ilin əvvəlinin göstəricisi 1 milyard 472,6 milyon manat olub.
2018-ci ilin əvvəlinə ödəniş vaxtı keçmiş kreditlərin məbləği 1 milyard 626,7 milyon manat, 2019-cu ilin əvvəlinə 1 milyard 585 milyon manat göstərilib.
Prezident İlham Əliyevin 28 fevral 2019-cu il fərmanı fiziki şəxslərlə 2012-ci il yanvarın 1-dən bağlanmış kredit müqavilələri üzrə gecikən borclar üçün devalvasiya kompensasiyaları nəzərdə tutub. Fərmana əsasən, 2015-ci il fevralın 21-nə xarici valyutada olan əsas kredit borcu üzrə 1 ABŞ dollarına 25 qəpik, həmin il dekabrın 21-nə xarici valyutada əsas kredit borcu üzrə 1 ABŞ dollarına 60 qəpik kompensasiya ödənib.
2020-ci ilin əvvəlində ödəniş vaxtı keçmiş kreditlərin 1 milyard 273,1 milyon manat həddində olduğu açıqlanıb.
