İki tibb müəssisəsində həbslər
Baş Prokurorluğun 22 aprel 2021-ci il məlumatına görə, Korrupsiyaya Qarşı Mübarizə Baş İdarəsinin əməliyyat-istintaq tədbirləri ilə “Yeni klinika” publik hüquqi şəxsin direktoru Pərviz Abbasovun koronavirus xəstələrinin tibb müəssisəsində yerləşdirilməsi müqabilində onların yaxınlarından rüşvət aldığı üzə çıxıb. Qeyd olunur ki, Pərviz Abbasovun tanışları Əvəz Hüseynov, Samir Mirzəyev və Vüsalə Əliyeva vasitəsilə ayrı-ayrı koronavirus xəstələrinin yaxınlarından hər xəstənin yerləşdirilməsi üçün 3000-3500 manat məbləğində pul alaraq aralarında bölməsinə əsaslı şübhələr müəyyən edilib. Pərviz Abbasova qabaqcadan əlbir olan bir qrup şəxsin rüşvət alması və təkrar rüşvət alması ittihamları irəli sürülüb, barəsində həbs qətimkan tədbiri seçilib: “Əvəz Hüseynov və Vüsalə Əliyevaya qabaqcadan əlbir olan bir qrup şəxsin rüşvət almasında köməkçilik və digər ittihamlar verilib, barələrində həbslə bağlı olmayan başqa qətimkan tədbiri seçilib, Samir Mirzəyev şübhəli şəxs qismində tutulub”.
Başqa bir məlumata əsasən, Fövqəladə Hallar Nazirliyinin Tibb Mərkəzinin Modul Tipli Hospitalının baş həkimi İmran Ağayevin eyni əməllər törətdiyi bilinib. Bu işdə həmin müəssisənin işçiləri Qulu Orucov və Taleh İmanlının da adları keçir. İmran Ağayev və Taleh İmanlıya qabaqcadan əlbir olan bir qrup şəxsin rüşvət alması və başqa ittihamlar irəli sürülüb, barələrində həbs qətimkan tədbiri seçilib, Qulu Orucov şübhəli şəxs qismində tutulub.
