Parad hazırlığına etiraz
Azərbaycanın Qarabağ bölgəsindəki Rusiya Ordusu bölmələri mayın 9-da təntənəli yürüş keçirməyə hazırlaşır.
Alman faşizmi üzərində 1945-ci il mayın 9-da əldə olunmuş qələbəyə həsr edilən yürüşün məşqləri Xocalıdakı hava limanında keçirilir. Məşqlərə 400-ə yaxın hərbi qulluqçu qatılır.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib, ərazidə özünü müstəqil dövlət sayan Dağlıq Qarabağ rejimi qurulub.
2020-ci il sentyabrın 27-dən Azərbaycan Ordusunun apardığı əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının, keçmiş Ağdərə rayonunun bir çox məntəqəsi azad olunub.
Noyabrın 10-na keçən gecə Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin birgə bəyanat imzalayıblar. Hərbi əməliyyatlar dayandırılıb, Dağlıq Qarabağda təmas xətti və Laçın yolu boyu Rusiyanın sülhməramlı kontingenti yerləşdirilib. Bu kontingentin odlu silahlarla silahlanmış 1960 hərbi qulluqçudan, 90 hərbi zirehli texnikadan, 380 ədəd avtomobildən və xüsusi texnikadan ibarət, bölgədə qalma müddətinin 5 il olduğu açıqlanıb.
Dekabrın 1-dək Ağdam, Kəlbəcər, Laçın rayonları Azərbaycana qaytarılıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi Rusiya Ordusu bölmələrinin əlindədir.
Novator.az-ın məlumatına görə, özünün “Facebook” səhifəsində şərh yayan AXCP sədri Əli Kərimli Rusiya sülhməramlılarının Qarabağda təntənəli yürüş keçirmək niyyətini güc nümayişi kimi qiymətləndirib: “Keçirilmə səbəbi nə olur olsun, hərbi parad güc nümayişi, əzələ göstərməkdir. Sülhməramlı missiya ilə güc nümayişi isə bir araya sığmır. “Sülhməramlı” adı altında Qarabağa qayıtmış Rusiya Ordusu Xankəndidə hərbi parada hazırlaşır. İlham Əliyev özündə güc tapıb Rusiya rəhbərliyinə xatırlatmalıdır ki, onların Qarabağda hərbi bazası yoxdur, Qarabağa sülhməramlı kimi müvəqqəti gəliblər, gedəcəklər. Xankəndidə parad keçirmək – güc nümayiş etdirmək onların rəsmi missiyasına ziddir. Belə getsə, bu “sülhməramlılar” vaxtından əvvəl ölkəmizdən çıxarılacaq”.
